Duo sýning í Gallery Port, september 2023.
Öll verkin voru unnin í samvinnu við Sigurrós G. Björnsdóttur.
Hvergi neitt en allt úti um allt.
Ómæli fermetra í botnlausu heimili. Túbuskjárinn útflattur.
Úr eternum flæðir músík í innfellda hljómstæðulausnina.
Hillur tæmast og bókasöfn dregin á tálar, stafrænt.
Hæð, breidd og dýpt kollvarpað í óræða vídd.
Eða mjódd öllu heldur.
Óræða mjódd með krókvana snaga.
Þar sem stóllinn er bara plata og setan brottfelld.
Útdregnar skúffurnar sem kassar í fötum keisarans og botninn suður í Borgarfirði.
Um leið:
Æskuástarbréfi falinn staður í holinu aftanvið skrifborðsskúffurnar.
Úr þeirri efstu mjakast mosabreiður ilmur af trénuðu pappírsryki og yddi.
Innvolsið párað gælunöfnum og saklausri svívirðu;
óreiðukennd teikning eftir öldurót skriffæra.
Kápulaus snagi slakar. Sæti laust.
Hvíldarinnar óyggjandi vísbending.
Það er búið að rýma til.
Texti eftir Arnljót Sigurðsson.